Elisabeth I.

D Elisabeth I., ängl. Elizabeth I., äigentlig Elizabeth Tudor, au bekannt under em Naame The Virgin Queen oder The Maiden Queen („Die jungfröiligi Königin“), Gloriana oder Good Queen Bess (* 7. Septämber 1533 z Greenwich; † 24. Merz 1603 z Richmond), isch vo 1558 bis zu iirem Dood Königin vo Ängland gsi.

D Elisabeth isch s fümfte und letschte Mitgliid vo dr Tudor-Dünastii uf em änglische Droon gsi.

Iiri Regierigszit as Königin vo Ängland und Irland vo 1558 bis 1603 isch hüte as s Elisabethanische Zitalter bekannt. In deere Zit het die Anglikanischi Chille iiri ändgültigi Usbräägig überchoo, si vili vo de Wärk vom William Shakespeare und vom Christopher Marlowe entstande, het dr Francis Bacon die modärni Wüsseschaft begründet und isch dr Francis Drake um d Wält gseeglet. Die ersti änglischi Kolonii in Amerika isch in deere Zit gründet worde und het zu iire Eere dr Naame Virginia überchoo, und dr Walter Raleigh het dr Härdöpfel und dr Dubak in Öiropa iigfüert.